Колдонуу шарттары

• Аккаунтка Google, Apple, Telegram же почта жана сырсөз менен киресиң. Кирүү жолдорун профилде аккаунтка байласаң болот — анда алардын каалаганы аны ачат.
• Сырсөздү жана каттагы, SMSтеги коддорду эч кимге айтпа, Google, Apple же Telegram аккаунтуңа башкаларды киргизбе: аккаунтта жасалгандын баары сен жасагандай эсептелет.
• Batele — 16 жашка толгондор үчүн. Тарифти 18 жаштан баштап же ата-эненин макулдугу менен төлөсө болот.
• Batele'ни ишиң же компанияң үчүн колдонсоң, шарттарды алардын атынан да кабыл аласың.

• Кредиттер — ЖИнин ишине төлөм: жаңы долбоор — 10 кредит, оңдоо — 1. Мурунку версияга кайтуу — акысыз.
• Жаңы аккаунтка — сыноо мөөнөтү: «Старт» тарифи жана 15 кредит. Сыноо мөөнөтүндө сайттарды чогултуп, оңдосо болот, ал эми жарыялоо — тарифти төлөгөндөн кийин.
• Кредиттер тарифти төлөгөндө келет, аларды кошумча сатып алса да болот. Кредиттер акчага алмаштырылбайт жана башка аккаунтка өтпөйт.
• ЖИ суроону аткара албаса же сен аны токтотсоң, анын кредиттери эсебиңе кайтат.

• Тарифтер, баалар жана аларга эмне кирери — batele.kg'деги «Тарифтер» бөлүмүндө жана кабинетте. Тариф бир айга же дароо бир жылга төлөнөт.
• Төлөм — банктын тиркемесинде ELQR аркылуу. Банк төлөмдү ырастаары менен тариф же кредиттер күйөт.
• Тариф өзү узартылбайт: төлөнгөн мөөнөт бүткөндө кабинет кайра төлөөнү сунуштайт.
• Тариф өз убагында төлөнбөсө, сайттар келгендерден жашырылат, ЖИ жана жарыялоо тындырылат. Сайттар, версиялар жана өтүнмөлөр мында өчүрүлбөйт: төлөсөң — баары ошол эле даректер боюнча кайра ачылат.
• Баалар өзгөрүшү мүмкүн. Жаңы баа кийинки төлөмдөн тартып колдонулат, төлөнүп койгон мөөнөт өзгөрбөйт.
• Акча кетип, тариф же кредиттер келбесе, бизге жаз — текшерип, аларды кошобуз же акчаны кайтарабыз. Акчаны кайтаруунун калган учурлары — Кыргыз Республикасынын «Керектөөчүлөрдүн укуктарын коргоо жөнүндө» мыйзамы боюнча.

• Сайтты ЖИ сенин сыпаттамаң боюнча чогултат. Ал жаңылышы мүмкүн: бааны чаташтырып, ашыкча нерсе кошуп, туура эмес которуп коюшу мүмкүн. Жарыялоодон мурун сайтты текшер — аны өз атыңдан сен жарыялайсың.
• ЖИден сайтка жок нерсени жазууну сураба: башкалардын пикирлерин, жалган арзандатууларды, башкалардын сыйлыктарын.
• Сайттагы ЖИ-бот келгендерге сайтта бар маалымат боюнча, сайтыңдын атынан жооп берет. Сайттагы маалымат туура болушун карап тур.
• ЖИ жасаган тексттер жана жасалга ар кандай адамдарда окшош болушу мүмкүн: окшош суроолор окшош сайттарды берет.

Batele'де төмөнкүлөрдү жасоого жана жарыялоого болбойт:

• Кыргыз Республикасынын мыйзамы тыюу салган нерселерди: тыюу салынган товарларды жана кызматтарды сатууну, кумар оюндарын, зомбулукка жана кастыкка чакырууларды;
• алдамчылыкты: жасалма дүкөндөрдү жана акча чогултууларды, сырсөздөрдү, карта маалыматтарын жана коддорду чогултууну, өзүңдү башка адам, компания же мамлекеттик орган катары көрсөтүүнү;
• уруксатсыз башкалардыкын: укугуң жок сүрөттөрдү, тексттерди, логотиптерди жана товардык белгилерди;
• адамдын макулдугусуз анын жеке маалыматтарын;
• чоңдор үчүн материалдарды жана балдарга зыян келтирген нерселердин баарын;
• вирустарды, спамды жана Batele менен башка сайттардын ишине тоскоол болгон нерселердин баарын.

Сайт ушул эрежелерди бузса же ага далилдер менен даттанышса, биз аны жашырып, ЖИ-тиркемелерди аккаунттан ажыратып же аккаунтту жаап коюшубуз мүмкүн. Мүмкүн болсо, адегенде эскертип, себебин түшүндүрөбүз.

• Сенин тексттериң, сүрөттөрүң, логотиптериң жана ишиңдин маалыматтары — сеники. Batele'ни колдонуп жүргөнүңдө сайттарыңды чогултуу, көрсөтүү жана жарыялоо үчүн аларды сактоого, иштетүүгө жана көрсөтүүгө Batele'ге уруксат бересиң.
• Жүктөгөн жана жарыялаган нерселериңдин баарына укугуң бар экенине сен жооп бересиң.
• Сен үчүн чогултулган сайтты ал Batele'де иштеп турганда ишиң үчүн чектөөсүз колдонсоң болот. Batele'нин өзү — кабинет, ЖИ, кызматтын шаблондору жана жасалгасы, программалык коду жана Batele белгиси — бизге таандык.
• «Старт» тарифинде жарыяланган сайтта «Batele менен жасалган» деген кичинекей шилтеме бар. «Бизнес» жана «Про» тарифтеринде ал жок.

• Жарыяланган сайт аты.batele.kg сыяктуу дарек боюнча ачылат. Атты сен тандайсың, эгер ал бош болсо жана адаштырбаса — мисалы, белгилүү компаниянын атын жамынбаса.
• Дарек сайт Batele'де жарыяланып турганда сеники. Долбоорду өчүрсөң, дарек бошоп, аны башка адам ала алат.
• Өз дарегиңди (мисалы, dastan.kg) «Бизнес» жана «Про» тарифтеринде кошсо болот; даректи каттоонун шарттары — каттоочуда.

Формалардагы өтүнмөлөрдү жана бот менен кат алышууну келгендер сага калтырат. Алардын байланыштарын кантип колдонгонуңа сен жооп бересиң: алар сураган иш боюнча гана чал жана жаз. Batele бул маалыматтарды кантип сактары — купуялык саясатында.

• Batele'ни ЖИ-тиркемеге кошуп, «Уруксат берүү» экранында көрсөтүлгөн чекте аккаунтуңда иш кылууга ага уруксат бересиң: долбоорлорду жасоо жана өзгөртүү, ал эми жарыялоо — сен сураганда.
• Тиркеменин сенин атыңдан кылган аракеттери сеники болуп эсептелет: кредиттер кабинеттегидей эле алынат.
• Тиркеменин өзүнө анын эрежелери колдонулат (OpenAI, Anthropic жана башкалар). Аны каалаган убакта кабинеттин жөндөөлөрүнөн ажыратса болот.

• Batele дайыма иштешине аракет кылабыз, бирок тыныгуусуз иштейт деп убада бербейбиз: жаңыртуулар, байланыштын үзүлүшү, банктардагы жана ЖИ кызматтарындагы бузулуулар болот.
• Batele өзгөрүп турат: мүмкүнчүлүктөрдү кошобуз, өзгөртөбүз жана алып салабыз. Сен үчүн маанилүү нерселер тууралуу алдын ала эскертебиз.
• Маанилүү тексттериңди жана сүрөттөрүңдү өзүңдө да сакта: алар Batele'де гана болбошу керек.

• Batele кандай болсо, ошондой берилет. Колдон чыккан пайда, ЖИнин тексттери боюнча кабыл алынган чечимдер жана сайттарыңа келгендердин аракеттери үчүн жооп бербейбиз.
• Batele биздин күнөөбүз менен иштебей калса, акыркы 3 айда төлөгөн суммаңдын чегинде жооп беребиз.
• Сайттарыңдын мазмуну үчүн сен жооп бересиң. Ал үчүн Batele'ге доомат коюлса, аны чечүүгө жардам берип, далилденген чыгымды төлөп бересиң.
• Бул чектөөлөр мыйзам берген укуктарды жокко чыгарбайт.

• Долбоорду кабинетте каалаган убакта өчүрсө болот — версиялары, өтүнмөлөрү жана дареги менен кошо.
• Бүт аккаунтту өчүрүү үчүн privacy@batele.kg дарегине жаз. Мында төлөнгөн мөөнөт жана кредиттер кайтарылбайт, мыйзам талап кылган учурлардан тышкары.
• Аккаунт ушул шарттарды бузса, аны жаап коюшубуз мүмкүн — «Эмнени жарыялоого болбойт» бөлүмүн кара.

Шарттарды өзгөртсөк, барактын башындагы датаны жаңыртабыз, ал эми маанилүү өзгөртүүлөр тууралуу кабинетте алдын ала — 7 күндөн кечиктирбей эскертебиз. Андан кийин да Batele'ни колдоно берсең, жаңы шарттарды кабыл алганың.

Шарттарга Кыргыз Республикасынын мыйзамдары колдонулат. Талашты адегенде кат алышуу жана сүйлөшүү аркылуу чечүүгө аракет кылабыз; болбосо — Batele жайгашкан жердеги сотто.

Batele. Batele жана төлөм боюнча суроолор — support@batele.kg. Маалыматтар жана аларды өчүрүү — privacy@batele.kg.